Sombintsombim-baovao

Nanomboka omaly any Kenya ny fiadiana ny ho tompondakan’i Afrika, taranja atletisma

Kitra

Ligy 11 no nandefa solontena ho an’ny fiadiana ny ho tompondaka rezionaly, taranja baolina kitra. Anisan’izany Analamanga, Bongolava, Itasy, Atsinanana, Diana, Sava, Sofia, Vatovavy Fitovinany, Matsiatra Ambony, Amoron’i Mania, Menabe, Anosy, Androy, Ihorombe, Boeny ary Atsimo andrefana. Rahampitso zoma amin’ny 4 ora hariva ao amin’ny efitranon’ny Café de la Gare no hanaovana ny fisarihana isam-bondrona. Ny 5 – 15 aogositra no hatao any Sava ny lalao.

Sazy

Voasazy tsy mahazo mandray anjara amin’ny fifaninanana baolina kitra mandritra ny taom-pilalaovana iray ny klioban’ny Asam. Io no didy navoakan’ny komity misahana ny fitsipi-pifehezana eo anivon’ny Federasiona malagasy. Vokatry ny fikasihan-tanana nataon’ny mpomba ity klioba ity ny mpitsara nandritra ny lalao nihaonan’ny Asam sy ny Cnaps Sport izany. Ity farany no hisolo tena ny Ligin’Itasy eo amin’ny fifaninanam-pirenena.

Atletisma

Nanomboka omaly any Kenya ny fiadiana ny ho tompondakan’i Afrika, taranja atletisma. Toy ny tamin’ny Mondial 2010, taranja baolina kitra, hahita mivantana io fifaninanana io ihany koa ny Malagasy. Amin’ny alalan’ny Canalsat Madagascar no hahafaha-manaraka izany, eo amin’ny “canal 68”.

Nangonin’i Tompondaka