Felaniary

Hivazo etsy amin’ny Pharaon

Hanatanteraka « live-cabaret » eny amin’ny Pharaon Super Club Ambohidahy i Felaniary ny zoma izao, manomboka amin’ny 9 ora alina. Hivazo ireo hira rehetra nahafantarana azy izy, arahin’ireo mpitendry matihanina mpiaraka aminy. « Amin’ny maha « cabaret » azy, hisy ny famerenan-kira ho an’izay mangataka ary mety hisy ihany koa ny fihirana hiran’olon-kafa », hoy ny fanazavan’i Felaniary. Anisan’ny ho heno ao an-toerana ilay hira malaza hiarahany amin’i Bodo, ho avy ao an-toerana rahateo ity farany raha ny fandaharam-potoana. Araka ny fanazavan’i Rija Ranaivoson, tompon’andraikitra sy mpandrindra hetsika ao amin’ny Pharaon, hisantatra ny fanavaozana ao amin’ity toeram-pilanonana ity i Felaniary. « Misy ny fanamboarana sy fanovan-javatra goavana ao an-toerana mba hanomezana fahafaham-po ny mpanjifa amin’izao ankatoky ny fotoam-pialan-tsasatra izao », hoy izy. Miara-miasa amin’ny karazana fikambanana ihany koa ny Pharaon Club, ka anisan’izany izao ohatra ny « Betongolo basket Club » (Bbc), izay hikarakara lanonam-pandihizana ao ihany ny zoma ho avy izao manomboka amin’ny 2 ora tolakandro. Mikarakara fitadiavam-bola ireto farany, izay hikatroka ny fifaninanana nasionaly amin’ny basikety. Hisantatra izay fanatsarana izay koa izy ireo. Hampiavaka ny lanonana ny fahitana Popom girls sy fandefasana lalaona basikety amin’ny « écran géant ».

Yves S.