« Metal in life, lethal in live »

Tarika mpivoy rock 4 hiray sehatra

Sahedena, Eternely, Manïa ary Iniah. Ireto tarika mpivoy ny mozika mavesatra ireto no hifampizara sehatra mandritra ilay seho « Metal in life, lethal in live ». Hotontosaina ny asabotsy 31 jolay izao ny seho, manomboka amin’ny 2 ora sy sasany, ao amin’ny Tranompokonolona Isotry. Fotoana iray hanehoan’ireto tarika ireto ny gadona « heavy metal » io, ho an’ireo mpankafy sy mpahalala ny mozika mavesatra. Raha ho an’ny tarika Manïa, ohatra, mbola mivoy ny « speed metal » sy ny « trash metal » koa izy ireo. Ny tarika Iniah kosa efa somary fantatra ihany, tamin’ny alalan’ilay hira « Gadra ». Mbola mety vaovao amin’ny sofina ihany ireto tarika ireto, saingy ireo mpankafy « hard » efa mahalala tsara ny santionan’ny sanganasany. Adiny telo eo ho eo ny fampisehoana, izay hezahina hanehoana ny mampiavaka ny tarika tsirairay. Marihina fa hezahina hifanaraka amin’ny maha fampisehoana « mavesatra » azy ny fanamafisam-peo sy ny jiro ravaka amin’io.

Zo ny Aina