« THB Tour 2010 » - Mahajanga

Hanokatra ny fialan-tsasatra

Toa ireo andiany teo aloha, hihazo an’i Mahajanga indray ny « THB Tour 2010 ». Hanamarika ny fanombohan’ny fialan-tsasatra any an-toerana izany, satria hotontosaina ny 5 hatramin’ny 8 aogositra izao ny hetsika. Tsy hoan’ireo tompon-tanàna ihany, noho izany, satria hampiaina ny fandaharam-potoanan’ireo mpiala sasatra misafidy an’i Mahajanga. Toerana roa manana ny lazany ao an-drenivohitr’i Boeny no handray ny hetsika. Ny maraina sy ny antoandro eny amin’ny torapasiky ny Grand Pavois Amborovy, ary ny alina kosa eny amin’ny Bord. « Podium » lehibe toy ny tamin’ny taon-dasa ihany no homanina isan-kalina, izay hoentanin’i Eric sy Honorat ao amin’ny tarika Fou Hehy. Fanentanana, fampisehoana, hatsikana, lalao, ary mazava ho azy ny fampisehoana no hifadimby mandritra izany. Fantatra mantsy fa i Lôla, izay anisan’ireo ambasadaoron’ny Thb no hanao ny fampisehoana lehibe, ny alin’ny 7 aogositra.

Hisy fanovana

Anisan’ny fanovana goavana nentin’ny « THB Tour 2010 » ny fijanonana isak’ireo tanàna lehibe manamorona ny RN4. Mialoha an’i Mahajanga mantsy, hijanona ao Maevatanàna ny hetsika ny 29 jolay, any Ambondromamy ny 31 jolay ary ao Amboromalandy ny 5 aogositra. Mbola i Eric sy Honorat ihany no hiantoka ny fanentanana mandritra ireo fijanonana ireo, ankoatra ny alim-pandihizana hafanain’ ireo mpikosoka kapila.

Zo ny Aina Randriatsiresy