[Gazety Taratra]

Ady tany niafara tamin'ny herisetra:Zaza enin-taona norasaina tamin'ny famaky

2010-09-08T09:17:59Z

Mampiteny ny moana ny fahasahiana ataon'ny olona sasany amin'ny valifaty sy ny fisomparana noho ny disadisam-piarahamonina, indrindra ny eo amin'ny samy mpianakavy. Tranga iray niseho tany amin'ny tanàna kely iray, ao amin'ny fokontany Navana, distrikan'i Maroantsetra ity nitrangana habibiana tsy roa aman-tany ity. Araka ny fantatra, nisy fianakaviana maromaro miady tany ao an-toerana. Efa an-taonany maro no nifandroritana izany ary mifampiandry kendry tohina izy mpiray tampo. Nivadika ho zavatra hafa anefa ny raharaha taty aoriana satria nahitahita tany Maroantsetra ny lehilahy iray ka nilaza ho tompon'ny tany ary nitondra mpitandro filaminana mihitsy namaritra ny tany. Nentin-tahotra ny havan'izy ireo sasany ka nanaiky mora. Nisy anefa ny nitsipaka noho ny tsy rariny satria samy mpandova ry zareo. Tamin'izay indrindra no nampitsiry ny hevi-dratsin'ilay rangahy. Nandrasany ho irery tany an-tsaha ilay zazalahikely ary tamin'ny fotoana tsy betsaka olona niasa. Nosamboriny sy novonovonoiny ary nokapainy ny famaky avy eo ny lohany. Niditra teo amin'ny ila tarehiny havanana ny famaky ary nampilatsaka ny valanoranony. Voatery nentina teny amin'ny hopitaly mihitsy ilay zaza ary mbola avotra soa aman-tsara ny ainy. Ny indrokely, zary lasa very saina izy.

Nitory

Nametraka fitoriana ny ray aman-dreniny taorian'izao zava-niseho izao satria saika ho taperina mihitsy ny ain-janany raha tsy nisy olona nahatazana ilay rangahy. Ny olana ho azy ireo anefa, ilay rangahy namono indray no tonga mialoha tany amin'ny mpanao famotorana. Tsy noraisina araka izany ny fitarainana nataon'ny havan'ireo niharan'ny herisetra. Niakatra aty an-drenivohitra araka izany ny fianakaviana ary nanatona ny tompon'andraikitra isan'ambaratongany satria niharan'ny tsindry hazo lena ry zareo. Mitohy mandraka izao ny fireharehan'ilay nikapa famaky satria tsy misy mahasahy misambotra izy.

r.r

Mahajanga:Vadina polisy voaroba 20 tapitrisa Ar

2010-09-08T09:16:10Z

Mirongatra koa ny tsy fandriampahalemana any amin'ny Faritra Boeny. Voaroban'ny jiolahy ny vola 20 tapitrisa Ariary an'ny mpanao varotra ambongadiny iray, izay vadina lehiben'ny polisy ao an-toerana. An-dalana hody izy no lasibatra tamin'ny faran'ny herinandro teo tetsy Tsaramandroso, Mahajanga. Niteraka resabe tany an-drenivohitry Boeny ny zava-nitranga satria tsy mba nisy olona nanaraka, afa-tsy lehilahy tsy afa-manohitra izay mpanafika no niaraka tamin-dramatoa. Ny andro anefa alina, volabe ihany koa no tany ambalahany. Ankoatra izay, lehilahy iray koa no voasolokin'ny mpampitombo vola. Noho ny faniriana hanambola be dia very roa tapitrisa Ariary indray kosa izy. Itony milaza azy ho mahay mampitombo vola itony indray kosa no namely azy. Nambakain'ny olona amin'ny fomba majika ity tantsaha ity, monina ao Ankaboka, kaominina Manarantsandry, distrikan'i Marovoay. Efa mandeha ny fikarohana mikasika ireo tranga roa ireo, saingy misedra olana ny mpanao famotorana. Mikasika ilay tantsahan'i Marovoay nihevitra ny hanankarena tampoka, takelaka taratasy maintimainty sisa naverin'ny mpisoloky raha toa ka volabe noheverina hitombo avo telo heny izany. Taorian'ny fanadihadiana, nahitam-bokany ny ezaka vita satria efa nisy olona roa voasambotra ireo mpisoloky. Raha mbola nitetika ny hanohy ny asa ratsiny ry zalahy dia diso adiresy. Mbola ireo olona efa nakany vola indray no norahonana sy notetehana hakana vola misimisy kokoa. Hanafahana ny naman'izy ireo voatazon'ny polisy hono izany. Tsy nahomby intsony ny fandraikiraikena ka dia napetraka ny vela-pandrika ary voasambotra avokoa ry zalahy.

Mikasika ilay fanafihana vadina polisy indray dia manao ny ainy tsy ho zavatra ny mpitandro filaminana saingy mbola niala maina. Manahirana ny raharaha satria sarotra ny fiaraha-miasa amin'ny vahoaka. Ireto farany izay matahotra ny valifatin'ny jiolahy sy tsy mahatoky intsony ny fitsarana ka mihidy vava, tsy manondro izay mety ho ao ambadik'ireny asa ratsy ireny. Miantso fokonolona ny tompon'andraikitry ny filaminana any an-toerana mba ho mailo sy tsy hanao tandrevaka.

Degar sy r.r

Dcssm-Ampahibe:Namoaka infirmiers 67 mianadahy

2010-09-08T09:13:24Z

Navoaka tamin'ny fomba ofisialy omaly maraina, teny amin'ny foiben'ny sampandraharaha misahana ny fahasalaman'ny Foloalindahy (Dcssm) ireo mpiofana ho infirmier 67 mianadahy. 80 izy ireo no nianatra saingy tsy afa-panadinana kosa ny 13. Avy amin'ny tafika, zandary, zazavao, mpiandry fonja, mpamonjy voina ary relijiozy ry zareo. Roa taona no faharetan'ny fianarana tao amin'ity sampandraharaha ity. Nahazo ny mari-pahaizana teknika laharana voalohany ry zareo ka mbola manohy fianarana avy hatrany mba hahazoana ny laharana faharoa. Efa ho 50 taona no nampiofana infirmier ny Dcssm ao Amparibe, saingy tsy fantatr'olona loatra izany. Amin'izao jobily lehibe izao, mihevitra ny tompon'andraikitra fa hanangana tsangambato lehibe dia ny fanokafana sekoly manokana ho an'ny sampandraharaha misahana ny fahasalaman'ny Foloalindahy. Tombanana hajoro manomboka ny volana oktobra izany araka ny fanazavan'ny dokotera sady Jeneraly Rakotonirina Johanesa.

r.r

Aretina Alzheimer:30 tapitrisa mahery ny marary maneran-tany

2010-09-08T10:05:20Z

Maherin'ny 30 tapitrisa ireo tratran'ny aretina Alzheimer maneran-tany. Efa an'arivony kosa ireo zokiolona ianjadian'izany eto amintsika. Ankalazaina maneran-tany amin'ny 21 septambra izao ny andro iraisam-pirenena ho an'ireo olona mararin'ity aretina ity. « Fotoana izao hanairana ny sain'ny tompon'andraikitra, ny fianakaviana amin'ny tokony handraisana fepetra hentitra ho fanatsarana ny tohana sy fitsaboana ireo olona mararin'ny Alzheimer », io no lohahevitra iarahan'ny fikambanana mivoy ao anatin'ny fankalazana.

Ho an'ny fikambanana Masoandro mody izay miahy manokana ireo marary eto amintsika, fanentanana ny rehetra indrindra ireo tompon'andraikitra isan-tsokajiny hijery sy hanampy ireo zokiolona no tanjon'izy ireo amin'ny fankalazana. Anisan'izany ny fanampiana andrandrain'izy ireo, indrindra ny fananganana ny foibe fanovozan-kevitra ery Ankadiefajoro, toerana handraisana ireo marary amin'ny antoandro, fanofanana ireo mpikarakara manokana ny zokiolona… Ao anatin'ny tetikasa ihany koa ny fanangonam-bola isan-karazany, varotra kitapo, sns.

Aretin'ny rentsika any amin'ny fitadidiana ny Alzheimer. Fanadinoana ny zava-nitranga vao haingana, fampifangaroana resaka tsy mifandray an-tendro, tsy fitadidiana teny fampiasa andavanandro no anisan'ny fitrangan'ny aretina any am-piandohana. Ankoatra izay, tsy mahafantatra fotoana, tsy tonga saina tsara ny marary. Tsy mahafantatra ny mety sy ny tsy mety ary mikorontan-tsaina tanteraka.

Zokiolona 1 amin'ny 20 mananika ny 65 taona, ary iray amin'ny dimy mananika ny 80 taona no tena tratrany. Tsy mamonjy foibem-pitaizana fa miaina any an-tranony ihany ny 25%-n'ny antitra tratran'ny Alzheimer any amin'ireo firenena mandroso. Mikarakara manokana azy ireo ny sampan-draharaha manokana miahy ny fahasalaman'ny zokiolona sy ny fikambanana isan-karazany. Any Etazonia, mandany hatrany amin'ny 100 miliara dolara ny fikarakarana sy fitsaboana ireo zokiolona mararin'ny Alzheimer.

Raha ny vinavinan'ny mpandalina, mety hiakatra hatrany amin'ny 100 tapitrisa any ho any ny isan'ny marary any amin'ny taona 2050.

Tatiana

Nosiala – Manakara:Notolorana harato 90 isa ny mponina

2010-09-08T10:03:23Z

Notolorana fitaovana hiasana sy entina manatsara kokoa ny hoavy, fa tsy kojakoja vonjy tavanandro toy ny fanaon'ny hafa, ireo mponina ao amin'ny tanàna iray antsoina hoe : Nosiala, 13 km miala ny distrikan'i Manakara. Tsy inona akory izany fa harato manara-penitra miisa 90, izay zava-dehibe tokoa ho an'ireto mponina mivelona amin'ny fihazana an-dranomasina ireto. Tsy nisy diso anjara tamin'izany na ny lahy na ny vavy. 50 isa ny an'iry sokajy voalohany, izay miasa hatrany amin'ny Ranomasimbe Indianina. Harato 40 isa kosa ny an'ireo renim-pianakaviana, izay tsy mikely soroka manampy ny vadiny amin'ny fandratoana patsabe any amoron'ny lakandranon'i Pangalana. Tafiditra ao anatin'ny tetikasa ara-tsôsialin'ny governemanta alemà ny nanomezan'ny fikambanana « Hilfe für Afrika » na « Fanampiana ho an'i Afrika » ireto harato mitentina 2 tapitrisa ariary ireto. Tetikasa miompana amin'ny fiahiana ireo mponina niharan'ny loza voajanahary. Ankoatra ity fikambanana ity, nanome lafaoro mandeha amin'ny masoandro ho an'ireto mponina ireto koa ny fikambanana soisa Ades. Tanjony tamin'izany ny hampihenana ny fampiasana kitay sy saribao, anisan'ny fosotra amin'ny fanimbana ny ala sy ny tontolo iainana. Nampianarina ny fampiasana ity fatana ity ny mpiasa iray ao an-toerana ka izy no hampita izany amin'ny hafa. Hivoaka atsy ho atsy koa ny fatana fanamainana trondro, fitaovana iray hafa tena ilain'ny mponina any amoron-tsiraka.

Landy R.

Indray mijery:Hotokanana anio ny fahavitan'ny tatatra sy lalankely 86 m vitan'ny firaisana fahefatra

2010-09-08T10:02:22Z

Hitokana zava-bita ny eny Anosizato Atsinanana

Hotokanana anio eny amin'ny Espace Jim Anosizato ny fahavitan'ny tatatra sy lalankely manara-penitra mirefy 86 m vitan'ny firaisana fahefatra ao anatin'ny fokontany Anosizato Atsinanana, izay nampian'ny fiaraha-mientan'ny fokonolona. Hanao tatitra ampahibemaso momba ny ezaka natao nandritra ny herintaona mahery ny tomponandraikitry ny fokontany sy ny boriborintany fahefatra ary manasa ireo tomponandraikitra eto amin'ny kaominina Antananarivo Renivohitra hanatrika ny hetsika anio. Nahazo ordinatera miaraka amin'ny kojakoja rehetra, paompy manara-penitra, tohatohabato ny fokontany.

*Mahavita zavatra betsaka ny fokonolona rehefa miara-mientana.

Ady amin'ny fisotroan'ny vehivavy bevohoka toaka

Hankalazaina rahampitso eny amin'ny toeram-pivorian'ny Bmh Isotry ny andro iraisam-pirenena momba ny ady amin'ny fandraisana toaka amin'ny fotoana hitondran'ny vehivavy vohoka karakarain'ny fikambanana Sehatra hanafoanana ny fisotroan'ny vehivavy mitondra vohoka toaka eto Madagasikara (Saf-Mada). Hovelabelarina mandritra ny tapak'andro maraina ny fomba entina hitsaboana ny olona manana fiankinan-doha amin'ny toaka. Hibahan-toerana koa ny fanentanana momba ny ady amin'ny fisotroan-toaka mandritra ny fotoana maha ao am-bohoka ny zaza. Arahina adihevitra sy fanomezana torohevitra ny fihaonana.

*Miteraka fahasamponana eo amin'ny zaza aterany ny fandraisan'ny vehivavy mitondra vohoka toaka.

Atrikasa momba ny zon'ny ankizy

Ho fanatsarana ny fandraisana an-tanana ireo zaza mila fanohanana eto amintsika, manomana atrikasa momba ny “Fifanarahana mahakasika ny zon'ny ankizy sy ny fampiharana izany eto amintsika” ny ivotoerana ambony momba ny asa sosialy Ists eny Mandriamena-Andoharanofotsy ny zoma izao. Nelly Rakotobe Ralambondrainy manam-pahaizana momba ny lalàna sy Ignace Rakoto mpampianatra eny amin'ny oniversite no hitondra fanazavana momba ny lohahevitra voalaza. Afaka manoratra anarana amin'ny adiresy istprog@mov.mg izay liana ka te hanaraka ny atrikasa.

*Mahasarika ny sokajin'olona maro ny zon'ny ankizy.

Vonjy A.

Fanaovam-beloma an-dRaoul:Miara-miombom-po ny Malagasy…

2010-09-08T09:54:12Z

Nihofahofa ny sainam-pirenena, nisy ny soratra fanaovam-beloma an-dRaoul, nanomboka tany Toamasina, ka hatreny Mahamasina omaly. Iny no porofo fa an'ny Malagasy ny Mahaleo, ary anisan'ny nanamarika ny tantaram-pirenena Raoul sy izy enina mirahalahy mbola eo. « Fanaovam-beloma an-dRaoul no hataontsika eto, ka aoka hariana ny lonilony sy ny tsy fifanarahana », hoy i Dama. Hafatra efa novoizin'ny Mahaleo hatramin'izay tany anatin'ny tononkirany izany. « Fihavanana tsy ravan'ny taona… ».

Iaraha-manana ny fahoriana, saingy mbola nitondra ny fampiononana ho an'ny fianakavian-dRaoul ihany ny tarika Mahaleo, notarihin'i Nono. Nanehoan'izy ireo teo imason'ny rehetra ny tsiambaratelon'ny lazan'ny Mahaleo hatramin'izay izany, dia ny firaisankinan'ny mpikambana rehetra, ka nahatratrarany izay taona maro izay. « Teo am-panomanana ny faha-40 taona izahay, ary efa nisy tetikasa maro tamin'izany, saingy hafa ny lahatra », hoy i Dama. Tazana teny koa ny Media Consulting, nandray an-tanana ny Mahaleo hatramin'ny taona 2005, sy ny solontenan'ny fitondram-panjakana.

Nirodorodo toa ireo olona marobe nameno ny Lapan'ny fanatanjahantena sy ny kolontsaina koa ireo mpanakanto. Tazana teny ireo avy amin'ny sehatra rehetra : mpanoratra, mpamorona, mpihira, mpitendry, mpanao teatra, sns. Nifandimby nanentana ny fiandrasana ny razana teto Antananarivo izy ireo. Natao an-kira sy mozika toa ireo rehetra efa lasana ihany, saingy tsikaritra tamin'ity fa tena hafa mihitsy ny fanomezam-boninahitra nataon'ireo mpanakanto namany an-dRaoul. Niara-niredona ny « Mifankataiva ihany » izy ireo, avy eo nitohy tamin'ny famelomana ireo sanganasan-dRaoul sy ny Mahaleo izany.

Mavesatra ny alahelo ho an'i Dama, Fafah, Dadah, Nono, Charle ary Bekoto, saingy nijoro izy ireo niatrika ireo olona marobe, naneho ny fahavononany amin'ny tohin'ny Mahaleo. Somary kendakenda ny Mahaleo raha niara-niredona ny « Raha mila fanampiana », « Fihavanana », « Somambisamby », sns. Angamba maro ny nametra-panontaniana tany anatiny tany : hanao ahoana ny Mahaleo, taorian'ny fahalasanan-dRaoul ?

Nanatontosa : Zo ny Aina / Fred/ Mamiherison

Kolontsaina:Anjakan'ny piraty koa ny hiragasy

2010-09-07T10:04:33Z

Tsy misy mpijery ny zavakanto tena malagasy matoa mbola mibahan-toerana ireo mpanao piraty. Lasibatra amin'izany koa ny hiragasy, izay voafetran'ny fotoam-pamadihana vao mahazo sehatra. « Satrin'ireo mpanao hiragasy mihitsy ny hamoaka rakikira na rakitsary, saingy vitsy ny mpamokatra manaiky hiara-hiasa amin'izy ireo », hoy i Dadafara, ao amin'ny LT Production. Porofon'izany, Rainitelo, tarika mpihiragasy iray monja, no mba nahatafavoaka rakikira maromaro, roa na telo kosa farafahabetsany ny an'ny ankamaroany. Ny antony ? Kivy ny mpamokatra, satria raha mivoaka anio ny rakikira iray, ny ampitson'iny dia efa hita eny an-tsena ny piraty, atobaka tsy amin'ahiahy. Vokany, « tsy miverina akory ny antsasaky ny vola lany tamin'ny fanatontosana ny rakikira na ny rakitsary », hoy hatrany i Dadafara. Nohamafisiny fa tsy fahasamihafany amin'ny halatra ny ataon'ny mpanao piraty eto amintsika ary ny tena manahirana, mahita lalana hatrany izy ireo na teo aza ny hetsika nataon'ny tompon'andraikitra. Ho an'ireo mpandraharaha manosika ny zavakanto malagasy, indrindra ny hiragasy, tsy misy afa tsy ny fanentanana ny mpanjifa hankafy ny vokatra tena izy no tetikady entina hampandeha ny raharaha. Hamafisina amin'ny fanatsarana hatrany ny vokatra atolotra azy ireo koa izany. Ho hita taratra, ohatra, izay fanatsarana izay amin'ny vokatra vaovaon'ny tarika Rasoalalao Kavia, izay mitondra ny lohateny hoe : « Na inona na inona holazaina, ny zava-bita ihany no jerena », ary hivoaka tsy ho ela. Seho an-tsehatra mivantana izy ity no navadika rakitsary, saingy namboarina sy nohatsaraina tany amin'ny trano fandraisam-peo kosa ny feony.

Landy R.

Fakafaka: « Ny mpanakanto tsy mba maty ! », saingy…

2010-09-07T10:01:22Z

Tsy isika Malagasy irery no milaza fa « ny mpanakanto tsy mba maty » fa saika izao tontolo izao mihitsy. Ny nahatonga izany ? Noho ireo sanganasa napetrany, toy ny hira, hosodoko, sokitra, diapenina, sns. Amin'ny fotoana mahamety azy, azo velomina hatrany ireny. Efa zary fahazaran'ny mpanakanto taty aoriana rahateo ny manao izany. Voahajan'izy ireo rahateo ny fepetra ahafahana manao izany raha eo amin'ny kirakiran-taratasy isan-karazany. Saingy…

… Tsy azo hadinoina fa tsy taratasy ihany no maha kanto ny kanto fa maro. Iray sady anisan'ny goavana indrindra amin'ireny ny fanajana ny talentan'ny maty. Eo amin'ny tontolon'ny hira sy mozika no tena ahitana ity tranga ity. Ilay finiavana hihira na hitendry ireo sanganasan'ny mpanakanto efa nodimandry, tena ananan'ny mpanakanto ankehitriny tokoa. Saingy firy amin'izy ireny no sahy milaza fa manaja ny mpamorona ka manao izay tsy hanovana ny sanganasany ?

Mety tsy hisy ny ahatafaverina tanteraka ny namoronan'ny tompony ireny sanganasa ireny saingy na izany aza, ny « manimba » kosa angamba mety azo adika ho fanaovana tsinontsinona ny teo aloha sy ny kanto niriariavany. Na mamono fanindroany mihitsy ilay mpanakanto fa tsy mba mamelona, araka ny fomba fiteny mahazatra. Raha ity tranga ity, tsy marina ilay fiteny hoe : « ny mpanakanto tsy mba maty ».

Tsy azo lavina tokoa fa ao ireo mpanakanto tanora miezaka mitana ny namoronan'ny tompony ny sanganasany. Manomboka maneho izany izy ireo tato ho ato. Na izany aza, mbola tsy ampy ny fampahafantarana raha tiana ny tsy ho faty tokoa ny mpanakanto efa nialoha lalana.

HaRy Razafindrakoto

Paositra 67 ha:Jiolahy iray voatifitry ny polisy

2010-09-08T09:20:40Z

Mbola tao anatin'ny fotoana nahabetsaka ny mpandalo no nipoaka ny basy teny 67 ha, ampitan'ny paositra ny takarivan'ny alatsinainy teo, tokony ho tamin'ny 7 ora sy sasany. Nahazo vaovao mantsy ny polisy eny amin'ny 67 ha fa misy jiolahy mihaodihaody eo akaikin'ny fiantsonan'ny fiara, efa malaza ratsy amin'ny fanendahana sy ny fandrobana isan-karazany. Tsy niandry ela fa nidina teny an-toerana avy hatrany izy ireo. Namoaka fitaovam-piadiana saika hanohitra ireo mpandroba, raha vao nanatona ireo polisy. Vokany nitifitra ny polisy ka voa teo amin'ny takibany ilay mpangalatra. Iny saika hisambotra azy iny indrindra ny polisy no niporitsaka izy ka tsy hita popoka intsony nanomboka teo. Toy izany koa ireo namany roa hafa. Marihina fa tsy sambany fa efa imbetsaka mifanehitra amin'ny jiolahy eo amin'ny toeram-piantsonan'ny taxi-be eo akaikin'ny paositra io ny polisy. Tamin'ny herintaona jiolahy iray no maty tsy tra-drano notifirin'ny polisin'ny Sag teo. Midika izany fa faritra mena amin'ny asan-jiolahy tokoa eny an-toerana. Raha ny tsikaritra, tsy amin'ny alina ihany fa na amin'ny andro antoandrobenanahary koa aza, mbola sahy manao ny asa ratsiny ireo jiolahy. Ny sinto-mahery sy ny fanendahana no tena ataon-dry zalahy amin'izany.

Mbola hamafisina ny fitandroana ny filaminana

Etsy ankilan'izay, nanamafy ny eo anivon'ny polisim-pirenena fa mitohy hatrany ny fanamafisana ny fitandroana ny filaminana eto an-drenivohitra sy ny manodidina. Tsy mitsaha-mihantsy ireo mpitandro filaminana tokoa mantsy ny jiolahy. Saika isan'andro no misy fanafihana etsy sy eroa. Vao herinandro monja, mpitandro filaminana mihitsy no voatifitra teny Ampitatafika. Mikasika ny fisafoana, misy ny polisy manao fisafoana ireo fiara eny amin'ny arabe, indrindra amin'ny alina. Miditra any anaty elakela-trano koa izy ireo misambotra ireo olona mihaodihaody amin'ny alina. Tsy nahitam-bokany firy anefa izany hatreto. Ireo tsy mitondra karatra no betsaka nosamborina fa ireo jiolahy raindahiny mirongo basy tsy mbola nisy tratra.

Henintsoa R.

Bois de rose:Hampahafantarina ny anaran'ireo tsy manara-dalàna

2010-09-07T08:43:26Z

Vao tamin'ny asabotsy alina teo, nahazo vaovao ny tao amin'ny minisiteran'ny tetibola sy ny vola, fa nisy sambo saika efa handeha hiondrana any ivelany, nitondra entana mampiahiahy. Najanona avy hatrany ilay sambo, ary nidina tany an-toerana ny Praiminisitra sy ny minisitry ny tetibola, Hery Rajaonarimampianina. Tsy teto Antananarivo kosa ny minisitry ny tontolo iainana sy ny ala, ny jeneraly Herilanto Raveloarison, fa mbola namita iraka tany Antsiranana. Rehefa nozohina akaiky, fantatra fa kaontenera sivy no nambara tany amin'ny haban-tseranana. Nambara tanaty taratasy fa kininina sy kesika ireo hazo, kanjo ny dimy ihany no izy fa bois de rose kosa no tao anatin'ny efatra. Voalaza koa fa nandalo fitiliana tamin'ny « scanner » ireo entana rehetra ireo, ka tsy nahitana zavatra nahiahiana nefa izao sarona izao ny asa maloto. Nitontaly 425 ireo bolabolan-kazo bois de rose tao anatin'ireo kaontenera. Nogiazana avy hatrany ny entana.

Tsy maintsy misy tompony

Mandeha ny fanadihadiana, ary efa tratra ny saoferan'ny kamiao iray nitatitra azy tao amin'ny seranan-tsambon'i Toamasina. Mbola karohina kosa ny roa hafa. Nahantona amin'ny asany koa ilay orinasa « transitaire », nanao ny fanambarana ny entana tany amin'ny ladoany sy nikarakara ny fandefasana azy ireo tany ivelany. Raha atao indray mijery, tsy maintsy nisy anaran'olona na orinasa, voalaza any anatin'ny taratasy fanambarana ny entana. Eo koa ireo tompon'andraiki-panjakana voarohirohy na mety nitsikomba tamin'ny fanaovana ny fanambarana diso. Santionany, ny tany amin'ny fitiliana « scanner » tao amin'ny ladoany, voalaza etsy ambony. Efa nahitana tranga toy izao ireo sinoa nanondrana an-tsokosoko bois de rose, nambara fa hazo voamboana, teny Ivato herinandro vitsy lasa izay. Nifanilihina ny andraikitra satria matahotra ny hampiharana sazy sy famaizana, nefa ifandrombahana indray raha toa ka sendra nahasarona.

Njaka Andriantefiarinesy

Toamasina:Mitohy ny hetsiky ny polisy, mangitakitaka ny olona

2010-09-07T08:40:29Z

« Amin'ny 6 ora hariva dia efa manomboka mangina ny tanàna ao Toamasina. Tsy maintsy mody aloha avokoa fa matahotra », hoy ny fitantaran'ny fianakaviana iray avy niala sasatra tany an-toerana, tonga teto Antananarivo ny alahady teo. « Mbola mitohy ny poa-basy ao an-tanànan'i Toamasina amin'ny alina. Tsy fantatra hoe avy aiza fa mampatahotra aloha, indrindra taorian'ny zava-nitranga ny herinandro teo », hoy ny fanazavana. Hatramin'ny nialan'ireto fianakaviana ireto tany an-toerana, tsy mbola nilamina tanteraka i Toamasina, fa somebiseby sy mangitakitaka ny olona, araka ny filazany. Vitsivitsy ny sahy mandeha alina fa samy misitrika any an-trano avokoa ny rehetra. Matahotra ny mety ho valifatin'ny jiolahy ny mponina. Nanamarika koa anefa ireto fianakaviana fa ireo mpiala sasatra, na ny mpihavy no tena matahotra amin'ny ankapobeny. Ireo tompon-tany tsy dia miraika firy aminy ny zava-miseho. « Efa toromarika omen'ny lehibe ny tsy maintsy hodiana aloha fa tsy milamina ny tany », hoy ny tanora. Tsy afaka nivoaka alina toy ny mahazatra ny tanora, etsy andaniny masiaka ny mpitandro filaminana amin'ny fisavana.

Mitohy ny hetsiky ny polisy

Araka ny fanazavana azo, mitohy hatrany ny hetsiky ny polisy ao Toamasina, taorian'ny fandalovan'ny Fip tany an-toerana, ny herinandro teo. Araka ny efa napetraky ny kaomisera lehiben'ny Fip, nampitandrina ireo jiolahy sy ny mpiray tsikombakomba aminy izy. Nanohy ny asany, araka izany, ireo mpitandro filaminana ao an-toerana, ary manao ny ainy tsy ho zavatra amin'ny ady atao amin'ny asan-jiolahy. Raha ny omaly aloha, hatramin'ny ora nanoratanay, nangingina ny asan-jiolahy tao Toamasina.

Yves S.

Fifanarahana politika:Ilaina ny fankatoavana nasionaly

2010-09-08T09:28:43Z

Ny tsy fahazoana sy ny fitadiavana ny fankatoavana iraisam-pirenena no anisan'ny olana na manahirana ny fitondrana tetezamita ankehitriny. Ala nenina farany ny hoe fitadiavam-bahaolan'ny samy Malagasy. Milaza ny mpanao politika fa olana politika no misy : vahaolana politika no ilaina, ary ny mpanao politika no mamaha azy. Ny mpanao politika ihany angaha no mitondra faisana amin'izao krizy politika efa lasa krizy ara-toekarena sy sosialy izao ? hoy anefa ny sasany. Mifandamina seza fotsiny ny mpanao politika amin'ny hoe famahana olana, hoy ny hafa. Eo no mahatonga ny hoe : ilaina ny fahazoana ny fankatoavana nasionaly ny vahaolana politika aroson'ny mpanao politika.

Efa nilaza ny avy amin'ny Mpandrindra nasionaly ny firaisamonina sivily (Cnosc) fa mbola tokony hahazo ny fankatoavan'ny Fihaonambem-pirenena hoe masi-mandidy ny Fifanarahana politika hamahana ny olana. Nilaza ireo mpanao politika fa mihatra avy hatrany ny Fifanarahan'izy ireo raha vao vita sonia : kendrena ho voapetraka alohan'ny Fihaonambem-pirenena amin'ny 13 septambra ny Antenimieran'ny tetezamita. Mbola tsy mahazo fahefana akory aza ny sasany amin'ireo mpanao politika dia mandidy dia homana toy izany, hoy ny sasany. Hadino amin'izany izay nifanaovana fanamby tamin'ny vahoaka : fiovana sy fanovana.

Fanomezana toerana be dia be izay antoko politika manao sonia ny Fifanarahana àry ve ny hoe fitadiavam-bahaolan'ny samy Malagasy ? Na samy manao izay saim-pantany amin'izany, fa tsy misy Raiamandreny to teny mpanelanelana... Mila ny fahazoana ny fankatoavan'ny vahoaka na ny solontenany amin'ny alalan'ny Fihaonambem-pirenena izao famahana ny krizy politika izao. Samy manana anjara amin'ny raharaham-pirenena ny rehetra, izay samy mpitondra faisana koa noho ny krizy na tsy voatery hahazo toerana amin'izany aza toy izay mahamaika ny mpanao politika sasany. Ho tonga hatraiza ny famahana olana eo amin'ny samy Malagasy izao, raha izao ny fandehany ?

R. Nd.

Ceni:Hamoaka voka-pifidianana haingana

2010-09-08T09:26:27Z

Na mbola iadian-kevitra eo amin'ny mpanao politika mafy aza ny firafitra sy ny asan'ny Vaomieram-pirenena mahaleo tena misahana ny fifidianana (Ceni), manohy ny asany am-pahanginana izy ireo, ao amin'ny foibeny eny Alarobia. Nikaondoha momba ny lalàna sy ny hirika hahazoana voka-pifidianana haingana ireo mpikambana tamin'ny herinandro teo, notarihin'ny filohany, ny Bâtonnier Rakotomanana Hery. Anisan'ireny ny fomba hampiasana ireo haitao amin'ny tambajotra vaovaon'ny fifandraisana avo lenta (Tic). Nambaran'ny mpiandraikitra ny fampitam-baovaon'ny Ceni fa nisy ny fihaonan'izy ireo tamin'ireo tompon'andraikitra teknikan'ny fitaovam-pifandraisana amin'ny finday, toy ny Telma sy ny Zain, ankoatra ireo fikambanana mampiasa ny teknika fampitam-bola maika toy ny Moneytech. Nofantarina nandritra ny dinika ireo faritra na distrika, hatramin'ny kaominina hahafaha-mampiasa ireo haitao ireo. Nanamafy ny filohan'ny Ceni fa tanjona hotratrarina ny hahazoana faran'izay haingana ireo voka-pifidianana manerana ny Nosy ary tsy hiandry andro maromaro toy ny teo aloha. Tsiahivina fa mampitsahatra ny latsa-bato amin'ny 4 ora hariva fa tsy amin'ny 6 ora toy ny nahazatra ny Lalàmpifidianana vaovao. Raha voafehin'ny Ceni ireo haitaon'ny fifandraisana ireo, azo inoana ny hahazoam-bokatra ny alin'ny androm-pifidianana, toy ny fahita any amin'ny tany efa mandroso.

Zoelson Randrianindrina

Cnosc:« Tsy maintsy iarahana ny Fihaonambem-pirenena »

2010-09-08T09:25:11Z

Nanamafy tamin'ny alalan'ny fanambarany, omaly, ny Fivondronamben'ireo firaisamonina sivily (Cnocs) fa ilàna fitoniana tanteraka sy hahitana ny hery velona rehetra (politika, fivavahana, fikambanana sns…) ny fanaovana ny Fihaonambem-pirenena. Izany no hatao mba ho tena iarahana sy tsy ifanilihana ny dinika handraisan'ny rehetra anjara. Araka ny fanazavan'izy ireo, tokony ho aorian'ny fanaovan-tsonia ireo antontan-taratasy avy amin'ny mpanelanelana avy eto an-toerana vao hatao ny Fihaonambem-pirenena tena mariky ny fiandrianana hokarakarain'izy ireo. Natao hampanaraham-penitra ny rivotra politika sy hanarenana ny firaisan-kina eo amin'ny fiarahamonina ary hanamora ny fiverenan'i Madagasikara ao amin'ny Vondrona Iraisam-pirenena izany, hoy ihany ny Cnosc.

Notsiahivin'izy ireo fa betsaka ny dingana vita teny Vontovorona. Anisan'izany ny fitanana ny Filohan'ny tetezamita eo amin'ny toerany, ny fametrahana governemantan'ny firaisam-pirenena hotarihin'ny Praiminisitra ifanarahana, ny momba ny Filankevitra ambonin'ny tetezamita (Cst) ao amin'ny Loholona sy ny Kongresin' ny tetezamita (Ct) eny amin'ny Antenimierampirenena. Torak'izany ny rafitra sasany toy ny Filankevi-pirenena ho amin'ny fampihavanana (Cnr), ny Filankevitra ara-toekarena sy sosialy (Ces), ny Ceni, ary ny maro hafa.

Nangonin'i Zo. Ra.

Tsipy kanetibe – Madagasikara:Hifanehatra ireo tompondaka

2010-09-08T10:11:21Z

Hotontosaina ny asabotsy 11 sy ny alahady 12 septambra izao, etsy amin'ny Kianjan'i Mahamasina ny fiadiana ny ho tompondakan'i Madagasikara, eo amin'ny taranja tsipy kanetibe. Ny fifaninanana ho an'olon-telo miaraka no hatao amin'ity. Ireo ekipa tompondaka isaky ny ligim-paritra miampy ireo klioba izay niatrika ny fifaninanana nampanaovin'izy ireo no tokony hafaka miatrika ity fifaninanam-pirenena ity. Andrasan'ny rehetra amin'izao fihaonana izao ny adin'ireo tompondakan'i Afrika 2009 ary hisolo tena an'i Madagasikara eo amin'ny fiadiana ny ho tompondaka eran-tany hatao any Izmir, Torkia ny 7 ka hatramin'ny 10 oktobra izao. Dolys, Tiana ary i Bema, miampy an'i Nanou, mpilalao fahefatra fiandry no solontenantsika amin'izany. Tafiditra ao anatin'ny fanomanan-tenan'izy ireo ihany koa mantsy ity lalao ity. Araka ny vaovao, hiditra amin'ny fampivondronana sy fanomanana farany ry zalahy aorian'ity fifaninanam-pirenena ity. Marihina fa isaky ny roa taona toy ny an'ny vehivavy sy ny “junior” indray ny fiadiana ny ho tompondaka eran-tany ho an'ny “senior” lehilahy.

Hiatrika ity fiadiana ny ho tompondakan'i Madagasikara ity koa ny vehivavy sy ny sokajy zandriny “junior”. Raha tsy misy ny fiovana, izay tompondaka amin'ity no hisolo tena an'i Madagasikara eo amin'ny fiadiana ny ho tompondaka eran-tany amin'ny taona 2011. Hisokatra ny zoma izao ny fisoratana anarana amin'ny fifaninanana.

Torcelin

Basikety:Yvan Mainini, filohan'ny Fiba vaovao

2010-09-08T10:09:21Z

Nifarana ny alatsinainy 6 septambra teo, tany Istanbul, Turquie, ny fivoriamben'ny federasiona iraisam-pirenen'ny taranja basikety (Fiba) andiany faha-19 rehefa nizotra nandritra ny hateloana (4 – 6 septambra). Hetsika fanao isaky ny efa-taona ary natao handinihina sy handaniana ny sata vaovao mifehy ny basikety maneran-tany. Mandritra izany koa no hanatanterahan'izy ireo ny fifidianana izay hitantana indray ny Fiba. Araka izany, lany ho filoha hitantana ny Fiba mandritra ny efa-taona i Yvan Mainini. Izy izany no nandimby an'ilay aostralianina, Bob Eiphinston, filoha teo aloha. Marihina fa filohan'ny federasiona frantsain'ny basikety (Ffbb) am-perinasa ity filoha vao lany ity. Izy no teratany frantsay faharoa teo amin'ny lohan'ny Fiba taorian'i Robert Busnel (1984 – 1990). Tanjon'ny Fiba kosa ny hampirisika ireo mpitantana sy mpikirakira ny basikety hiasa amin'ny fomba maoderina. Laharam-pahamehan'izy ireo ny hamaha faran'izay haingana ny olana goavana misy eo amin'ny fandaharam-potoana iraisam-pirenena. Tsiahivina fa anisan'ny nanatrika io fivoriamben'ny Fiba io ny filohan'ny federasiona malagasy (Fmbb), Jean Michel Ramaroson. Andrasana ny tatitra mikasika ny hetsika hataon'ny Fmbb ato ho ato.

Miary Narindra

Kitra – Madagasikara:Vonona ny Cnaps Sport

2010-09-08T10:08:00Z

Hitohy amin'ny alahady ho avy izao ny fiadiana ny amboaran'i Madagasikara amin'ny baolina kitra « Telma Coupe de Mada ». Anisan'ireo hiatrika izany ny klioban'ny Cnaps Sport, tompondakan'ny Ligin'Itasy. Vonona ity ekipa ity, izay hiatrika ny Fc Ilakaka. Fihaonana izay hotontosaina any Fianarantsoa. Nialoha io fihaonana io, niatrika lalao ara-pirahalahiana sy fitsapana tamin'ny ekipa voafantin'i Soavinandriana izy ireo ny alahady lasa teo, tao amin'ny Kianjan'Itasy. 5 noho 1 no nandavoan'ny Cnaps Sport, ity ekipa mpifanandrina taminy ity. Ankoatra izay, mbola hiatrika ny fiadiana ny ho tompondakan'i Madagasikara « Thb Champion's League » ihany koa ny Cnaps. Ao amin'ny vondrona B no misy azy ary miara-dia amin'ny Tana Formation sy ny As Vatsy. Hatao any Tsiroanomandidy ny fifanintsanana ho azy ireo. Natao io andron'ny alahady io ihany koa ny fizarana ny amboaran'ny Ligin'Itasy izay lasan'ny Cnaps Sport, tamin'ity taona ity. Nanokatra ny fihaonana ny lalaon'ny sokajy « vétéran ». Resin'ny Cnaps 2 noho tsy misy, i Soavinandriana.

Torcelin

Fandraharahana:Hiparitaka ny « Sme Toolkit »

2010-09-08T09:37:42Z

Nanampy isa ny orinasa Zain sy ny International Finance Corporation (Ifc) ny Boa Madagascar, amin'ny fanapariahana ny « Sme Toolkit ». Taorian'ny namoahana azy tamin'ny fomba ofisialy, mihamitombo tsikelikely ireo mpandraharaha manana orinasa madinika sy salantsalany mahita tombony amin'ity fitaovana ity. Vokatr'izany, nanatona ny banky Boa Madagascar, izay anisan'ny miara-miasa akaiky amin'ireo orinasa madinika sy salantsalany ny Zain, mba hanamorana kokoa izany. Nampahafantarina omaly, teny amin'ny sampan'ny Boa Tanjombato ny fiaraha-miasa vaovao, ka fantatra izao fa hisy ny sehatra manokana hampahafantarana ny « Sme Toolkit » ho an'izay liana, eny amin'ny sampan' ny Boa Ambanidia, Sabotsy Namehana, Mahitsy, Itaosy ary Tanjombato. « Inoanay fa hipaka any amin'ny fampiroboroboana ny toekarena amin'ny ankapobeny ity fitaovana ity, ary izay no anton'ny fanitarana ny fiaraha-miasa », hoy i Tsiresy Andriamampionona, tale jeneralin'ny Zain Madagascar. « Banky ho an'ny rehetra, saingy manome vahana ireo mpandraharaha ny Boa. Anisan'ny tanjonay ny fanohanana ara-pitaovana ireo orinasa madinika sy salantsalany hahafahany mivelatra », hoy kosa i Jacques Dilet, tale jeneralin'ny Boa Madagascar.

Araka ny fampahafantarana hatramin'izay, fitaovana sy torolalana, homena maimaimpoana ireo mpandraharaha, mba ho matihanina kokoa ny « Sme Toolkit ». Misy torohevitra maro, manomboka any amin'ny fananganana orinasa, ny fitadiavana lalam-barotra, ny fitantanana, hatrany amin'ny resaka lalana izany. Ankoatra ny tranonkala http://www.madagascar.smetoolkit.org sy ny finday, misy amin'ny endriny Cd-Rom koa ny « Sme Toolkit », izay zaraina maimaimpoana ihany.

Zo ny Aina

Jirama:Mari-boninahitra tany Toamasina

2010-09-08T09:36:02Z

Ankoatra ny fitokanana ny toby mpamatsy herinaratra tany Betainomby Toamasina, dia mpiasa 249 no nomena mari-boninahitra, tamin'ireo 489. Ny lehiben'ny mari-boninahi-pirenena Etienne Ralitera no nanolotra izany tamin'ny zoma 3 septambra tolakandro teo. Mitsinjara toy izao izany : « Commandeur de l'ordre national » (1) ; « Officier de l'ordre national » (20) ; « Chevalier de l'ordre national » (38) ; « Officier de mérite » (19) ; « Chevalier de l'ordre de mérite » (4) ; medaly volafotsy (44) ; alimo (12).

Sajo

Mahazoarivo:Fanitsiana ny tetibola 2010

2010-09-08T09:33:50Z

Anisan'ny tapaka nandritra ny filankevitry ny governemanta tamin'ny 7 septambra teo teny Mahazoarivo ny famoahana ny didy hitsivolana laharana 2010-006, hanitsiana ny lalàna mifehy ny fitantanam-bola 2010. Noho ny tsy fisian'ny Antenimierampirenena mantsy dia voatery didy hitsivolan'ny filankevitry ny governemanta ihany no azo atao. Nivoaka koa ny didim-panjakana hanonerana vola ny tompon-tany nesorina tamin'ny lalan'ny Galana Raffinerie Terminal any Toamasina. Ankoatra izany, misy ny fiaraha-miasa amin'ny handefasan'ny Canalsat Réunion ny fandaharana rehetra avy amin'ny Televiziona Malagasy (Tvm). Afaka hahita ny Tvm, noho izany ny any La Réunion, Mayotte, Maorisy, Kaomoro ary Seychelles.

Nangonin'i Njaka A.